Música

É ben coñecido o feito de que a música está intimamente ligada á poboación xuvenil e incluso existen estudios que analizan estas dúas variables (música e xuventude). Son, precisamente os mozos e mozas os que realizan un maior consumo de produtos relacionados co eido da música, chegando incluso a influír na súa forma de ser e de relacionarse.
Tendo en conta esta premisa, e contando ademais coa tradición musical da nosa cidade, a Concellería de Xuventude de Vigo trazouse a tarefa de implicar ós mozos e mozas da cidade nun proxecto feito por e para eles/elas mesmos, onde, ademais de facilitar e apoiar as iniciativas musicais no tempo de lecer, sexa un espazo de encontro e formación que fomente a participación activa.
As actividades a desenvolver dentro deste programa son múltiples e variadas, debido á súa intencionalidade de apoiar iniciativas xuvenís e, ó mesmo tempo, pretender un proxecto integral. Así pois, podemos destacar as seguintes:

a) Locais de ensaio onde os grupos e/ou outro tipo de formacións musicais (cantautores, dúos, bandas, etc.) poidan ensaiar, compoñer os seus temas e perfeccionar o seu estilo.

Nestes intres, a Concellería de Xuventude conta con dous locais (un na Casa da Xuventude e outro no Espazo Xove do Castro) que funcionan todo o ano, agás no mes de agosto.

b) Cursiños, en horarios alternativos, dalgunhas especialidades moi solicitadas: guitarra eléctrica, percusión, baixo, etc.

c) Información:

- Información e asesoramento personalizado sobre temas relacionados coa música como cursos, concursos, actuacións, contactos, etc.
- Autoconsulta: información actualizada na páxina web da Concellería de Xuventude, así como nos paneis situados nos locais de ensaio e nas carpetas de autoconsulta da Casa da Xuventude.
- Contactos a través de correo electrónico ou vía telefónica para informacións puntuais.

d) Promoción:
Guía de grupos noveis de Vigo na páxina web da Concellería de Xuventude (www.xuventudevigo.org) de xeito que calquera entidade e/ou particular que o desexe poida coñecer aos grupos e contactar directamente con eles.

Concertos ao aire libre, co obxecto de que os grupos noveis teñan unha oportunidade de amosar o que están a facer, darse a coñecer na cidade ou simplemente ter a oportunidade de subirse por primeira vez a un escenario cun público diante.

Gravacións de maquetas a aqueles grupos que están preparados para actuar, participar en concursos, etc.

e) Concurso de maquetas: Esta é unha iniciativa presentada polos grupos de música noveis da cidade e que pretende ser un punto de referencia para todos aqueles mozos e mozas que gozan coa música.