Promover o talento e o potencial da mocidade da provincia
A Deputación de Pontevedra lanza unha nova edición dos Premios Provinciais á Xuventude para promover o talento e o potencial da mocidade da nosa provincia. A institución repartirá 36.000 euros entre os mellores proxectos que compitan nun total de once categorías.
A Deputación de Pontevedra pon en marcha os Premios Provinciais á Xuventude a través do Servizo de Cohesión Social e Xuventude. O obxectivo destes galardóns é promover o talento da mocidade da provincia.
Estes premios anuais están dirixidos a persoas mozas de idades comprendidas entre os 16 e os 35 anos e o seu fin é recoñecer a calidade dos traballos realizados nun total de once categorías: iniciativa social, iniciativa empresarial, educación en valores, investigación, contido audiovisual, traballo musical, traballo literario breve, banda deseñada, fotografía orixinal, reacción polo clima, deseño e moda.
Na categoría de iniciativa social, educación en valores e reacción polo clima permítese especificamente a concorrencia de proxectos de centros educativos nos que participase alumnado de entre 12 e 18 anos.
As persoas interesadas en participar teñen un prazo de dous meses para inscribirse, que comezará a partir do día seguinte ao da publicación das bases. Unha vez validadas, a Deputación de Pontevedra abrirá un segundo prazo para presentar os proxectos, que finalizará o 16 de agosto.
