A Xunta de Galicia abre o prazo para inscribirse no Programa de Voluntariado Ambiental Interxeracional en 22 espazos naturais da Comunidade. Esta iniciativa gratuíta ofrece un completo programa de actividades que impulsan o respecto e o coidado por un dos grandes tesouros de Galicia, o seu patrimonio natural.
Nesta quinta edición da iniciativa, posta en marcha polas Consellerías de Cultura, Lingua e Xuventude e a Consellería de Medio Ambiente e Cambio Climático ampliaranse os espazos naturais incluíndo as Paisaxes Protexidas e Humedais Protexidos. Serán un total de 28 actuacións que se levarán a cabo as fins de semana desde o 23 de maio ata o 12 de outubro. A primeira cita será no Parque Natural Complexo Dunar de Corrubedo e Lagoas de Carregal e Vixán e na Ría de Ribadeo e Praia das Catedrais.
Espazos naturais
Están programadas accións no Parque Nacional das Illas Atlánticas (Illa de Ons, Cíes e Cortegada); nos Parques Naturais (Baixa Limia- Serra do Xurés, Complexo dunar de Corrubedo e Lagoas de Carregal e Vixán, O Invernadeiro, Serra da Enciña da Lastra, Monte Aloia e Fragas do Eume); Monumentos Naturais (A Carballa da Rocha, Pena Corneira, Souto de Rozabales, Pregamento xeolóxico de Campodola-Leixazós, A Fraga de Catasós); Paisaxes Protexidas (Penedos de Pasarela e Traba, Val do río Navea) e Humedais Protexidos (Ría de Ribadeo e Praia das Catedrais, Complexo intermareal Umia -O Grove (A Lanzada, punta Carreirón e Lagoa Bodeira), Ría de Ortigueira e Ladrido, Lagoa e Areal de Valdoviño e Lagoa de Cospeito.
Os escenarios serán, polo tanto, 22 espazos naturais que compoñen o rico patrimonio natural de Galicia.
As actividades das persoas voluntarias participantes centraranse na preservación, limpeza e conservación destes espazos, eliminación de lixo de praias, ríos e montes, sensibilización, coñecemento dos ecosistemas, visibilización mediática de rutas e análise de todas aquelas actuacións con posible incidencia no medio natural continental desde un punto de vista técnico, detectando os distintos efectos e/ou impactos ambientais. O programa procura fomentar a cooperación e a solidariedade desinteresada desde unha perspectiva interxeracional entre persoas maiores e novas, nun marco de convivencia e intercambio de vivencias neste específico ámbito de actuación, poñendo especial atención nas contornas rurais e as posibilidades que ofrecen desde esta perspectiva para a mellora do asentamento poboacional.
A Xunta de Galicia cubrirá os gastos de desprazamento (transporte desde Santiago de Compostela no caso dos Parques Naturais, Monumentos Naturais, Paisaxes Protexidas, Humedais Protexidos e barco no caso dos Parques Nacionais), manutención, aloxamento, seguros e actividades formativas. Cada participante deberá levar os seus útiles de aseo persoal, así coma calzado e roupa axeitada para actividades ao aire libre.
Prazo de inscrición
O prazo de inscrición comezará o 15 de maio ata completar as quendas.
Para ampliar as posibilidades de participación das persoas interesadas, cada persoa voluntaria poderá anotarse en dúas accións como máximo.
Se o grupo de persoas inscritas nunha actividade excede do máximo permitido para cada zona, a selección realizarase por rigoroso orde de inscrición.
Inscrición
As persoas interesadas en inscribirse nesta quinta edición do Programa de Voluntariado Ambiental Interxeracional poden facelo a través do espazo habilitado na páxina web www.voluntariadogalego.org. Os únicos requisitos para participar neste programa autonómico son: ter cumpridos os 18 anos, residir na Comunidade Autónoma de Galicia e cumprimentar o formulario que se atopa na páxina web.
| Espazo Natural | Prazas | Data | |
| 1 | Parque Natural Complexo Dunar de Corrubedo e Lagoas de Carregal e Vixán | 15 | do 23 ao 25 de maio |
| 2 | Ría de Ribadeo e Praia das Catedrais | 15 | do 23 ao 25 de maio |
| 3 | Parque Nacional marítimo-terrestre das Illas Atlánticas de Galicia lla de Ons | 10 | do 30 de maio ao 1 de xuño |
| 4 | Parque Natural O Invernadeiro | 15 | do 30 de maio ao 1 de xuño |
| 5 | Complexo intermareal Umia -O Grove ( A Lanzada, punta Carreirón e Lagoa Bodeira) | 15 | do 06 ao 08 de xuño |
| 6 | Parque Natural Serra da Enciña da Lastra | 15 | do 06 ao 08 de xuño |
| 7 | Ría de Ortigueira e Ladrido | 15 | do 13 ao 15 de xuño |
| 8 | Parque Natural Monte Aloia | 15 | do 13 ao 15 de xuño |
| 9 | Monumento Natural A Carballa da Rocha | 15 | do 20 ao 22 de xuño |
| 10 | Parque Natural Complexo Dunar de Corrubedo e Lagoas de Carregal e Vixán | 15 | do 20 ao 22 de xuño |
| 11 | Parque Natural Fragas do Eume | 15 | do 27 ao 29 de xuño |
| 12 | Parque Nacional marítimo-terrestre das Illas Atlánticas de Galicia Illas Cíes | 10 | do 27 ao 29 de xuño |
| 13 | Monumento Natural Souto de Rozabales | 14 | do 04 ao 06 de xullo |
| 14 | Monumento Natural A Fraga de Catasós | 15 | do 04 ao 06 de xullo |
| 15 | Pregamento xeolóxico de Campodola-Leixazós | 15 | do 11 ao 13 de xullo |
| 16 | Monumento Natural Pena Corneira | 15 | do 11 ao 13 de xullo |
| 17 | Val do río Navea | 15 | do 01 ao 03 de agosto |
| 18 | Parque Natural Fragas do Eume | 15 | do 05 ao 07 de setembro |
| 19 | Parque Nacional marítimo-terreste das Illas Atlánticas de Galicia Illa de Cortegada | 10 | do 05 ao 07 de setembro |
| 20 | Parque Natural Serra da Enciña da Lastra | 15 | do 12 ao 14 de setembro |
| 21 | Parque Nacional marítimo-terrestre das Illas Atlánticas de Galicia Illas Cíes | 10 | do 12 ao 14 de setembro |
| 22 | Parque Natural Monte Aloia | 15 | do 19 ao 21 de setembro |
| 23 | Lagoa e Areal de Valdoviño | 15 | do 19 ao 21 de setembro |
| 24 | Penedos de Pasarela e Traba | 15 | do 26 ao 28 de setembro |
| 25 | Parque Natural O Invernadeiro | 15 | do 26 ao 28 de setembro |
| 26 | Lagoa de Cospeito | 15 | do 03 ao 05 outubro |
| 27 | Parque Natural e Reserva da Biosfera de Baixa Limia-Serra do Xurés | 15 | do 03 ao 05 outubro |
| 28 | Parque Natural e Reserva da Biosfera de Baixa Limia-Serra do Xurés | 15 | do 10 ao 12 de outubro |
